Albania News Agency

Në një postim në Truth Social, Trump deklaroi se qeveria e udhëheqësit venezuelian Nicolas Maduro është cilësuar si organizatë terroriste e huaj dhe është akuzuar, përveç vjedhjes së aseteve amerikane, për “terrorizëm, trafik droge dhe trafik njerëzish”.

“Për këtë arsye, sot urdhëroj një bllokadë TË PLOTË DHE GJITHËPËRFSHIRËSE ndaj të gjithë cisternave të naftës të sanksionuara që hyjnë dhe dalin nga Venezuela”, shtoi ai.

Trump tha gjithashtu se Venezuela është “plotësisht e rrethuar nga flota më e madhe e mbledhur ndonjëherë në historinë e Amerikës së Jugut”.

Ai shtoi se kjo “do të vazhdojë të zgjerohet” dhe “do të ngjajë me diçka që ata nuk e kanë parë kurrë më parë”.

Trump gjithashtu akuzoi qeverinë e Maduros për përdorimin e naftës së vjedhur për “vetëfinancim, narkoterrorizëm, trafik njerëzish, vrasje dhe rrëmbime”.

Venezuela, e cila strehon disa nga rezervat më të mëdha të provuara të naftës në botë, nga ana e saj akuzoi Uashingtonin se po përpiqet t’i vjedhë burimet e saj.

Si gjatë presidencës së Trumpit ashtu edhe gjatë asaj të ish-presidentit Joe Biden, SHBA për vite me radhë ka kundërshtuar qeverinë e Maduros dhe ka ushtruar presion për rrëzimin e saj përmes sanksioneve të ashpra.

Javën e kaluar, SHBA vendosi sanksione të reja ndaj edhe gjashtë anijeve të tjera për të cilat tha se transportonin naftë venezueliane.